RII True Stories: Story 2

Dear RII,

Siak ket maysa nga OFW. Kayat ko man lang i-share kanya yu ti maysa nga paset met ti biag ko nga ammok nga pakapidutan ti amin ti adal.

Adu ti agibaga nga ti panagabroad laeng ti sungbat dagiti rigat ti biag. Mamati nak met a ta adu ti kabaryuan tayon nga nagabroad ket pimmintas met ti biag dan. Isu nga nagtarrigagay nak met nga mapan ballasiw-taaw tapno pumintas met ti biag ti pamilyak.

Ngem kas ti amin nga istorya ti biag, adda latta met ti mayat adda met ti madi. Idi
damu, ti ammok ket nalaka laeng ti biag ti OFW ngem idi napadasakun ket narigat met gayam. Umuna, ti napigsa nga kalaban ket iliw iti lugar nga nagdakkelam ken nangnangruna ti iliw ti pamilyam. Maikadwa ket diay oras nga mapukaw nga kadwam ti pamilyam. Ket maikatlo ket ti rigat ti agtrabaho ti sabali nga pagilian ken sabali nga kultura.

Gapu ti gagar ko nga lumung aw ti panagbiag, nakayanak amin dagiti rigat. Ngem ti nasakit ket diay kasla mariknam nga haan nga ik-ikkan ti importansya ti pamilyam diay Pilipinas ti rigat ken bannug mo nga agtrabaho ti adayo. Nu man pay mayat met ti rikna nga agipatulod ti kwarta ti pamilyam ti Pilipinas, ti rigat na ket kasla met lang awan ti pappanan ti kwarta nu makadanun dita Pilipinasen. Nu dadduma pay ket kasla agitakki nak ti kwarta ta kanayun la nga maibusan ti pamilya kun. Uray nu kasta ket nagurnong nak met laeng tapno addan tu ti kwarta nu agawid nak.

Ti maysa pay nga kasla pagbabawyak ket madik nga nakita ti panagdakkel dagiti annak ko ken panagbaket ken panaglakay dagiti nagannak ko. Kas kadagiti kaadwan, ammok nga napan tay ballasiw taaw tapno maikkan tayo ti mayat nga masakbayan ti pamilya tayo. Ngem sabali gayam met latta nu matarabay mo ti panagdakkel dagiti annak mo. Kanayun ko isang sangit nu malagip ko nga nabay bay-an met dagiti annak kon. Diay pangarap ko nga makaadal da kuma ket pulos haan met napasamak nu di ket di kabaliktaran na met. Nasapa da nga nagka-bisyo, haan da naturpos ti panagadal da. Nu dadduma ket kasla basol ko payen nu apay nga nabay bay-an da. Nu amirisek ket talaga nga adda met nagkurangak. Dagidiay aldaw nga adda nak kuma diay sibay da nga mangiturtuong ti amin nga aramid da. Siguro maymayat ti panangpadakkel ko kanya da nu haan nak napan ballasiw-taaw.

Nu man pay kasta, ammok nga madik maisublin ti napalabas. Ti maaramidak lattan ita ket tulungak nga pumintas ti biag ti pamilyak. Kas kuna da ngarud, haan pay naudi ti amin.Ammok nga amin nga pasamak ti biag ket adda ti kayat na saw-en. Adda latta adal nga maala.

Toy nagsurat,

XXX